اسلام آباد: ٹک ٹاکر ثناء یوسف کے قتل کے مقدمے میں گرفتار مرکزی ملزم عمر حیات کو ڈسٹرکٹ اینڈ سیشن کورٹ اسلام آباد نے 14 روزہ جوڈیشل ریمانڈ پر جیل بھیج دیا ہے۔
جوڈیشل مجسٹریٹ احمد شہزاد گوندل کی عدالت میں کیس کی سماعت ہوئی، جہاں پولیس نے عمر حیات کو سخت سیکیورٹی میں چہرہ ڈھانپ کر پیش کیا۔ دوران سماعت پولیس کی جانب سے ملزم کے جسمانی ریمانڈ اور شناخت پریڈ کی استدعا کی گئی۔سماعت کے آغاز پر پراسیکیوٹرز کی عدالت میں عدم موجودگی پر مجسٹریٹ نے سخت برہمی کا اظہار کیا۔ انہوں نے ریمارکس دیے کہ "میری عدالت کے پراسیکیوٹر کہاں ہیں؟ ویسے تو یہ آتے نہیں، آج سب آ گئے ہیں!” عدالت نے فوری طور پر ڈسٹرکٹ پراسیکیوٹر کو طلب کرنے کا حکم دیا۔
ڈیوٹی پراسیکیوٹر نے عدالت کو آگاہ کیا کہ متعلقہ پراسیکیوٹر رخصت پر ہیں، جس پر مجسٹریٹ نے دوٹوک انداز میں کہا کہ "جب تک ڈسٹرکٹ پراسیکیوٹر نہیں آتا، کیس آگے نہیں بڑھے گا۔” عدالت نے پراسیکیوٹر کی عدم دستیابی پر سماعت میں مختصر وقفہ دیا، جس کے بعد کارروائی دوبارہ شروع ہوئی۔
سماعت مکمل ہونے پر عدالت نے تفتیشی افسر کی استدعا منظور کرتے ہوئے ملزم عمر حیات کو شناخت پریڈ کے لیے 14 روزہ جوڈیشل ریمانڈ پر اڈیالہ جیل منتقل کرنے کا حکم دیا۔عدالتی حکم میں یہ بھی کہا گیا کہ جیل حکام ملزم کی شناخت پریڈ کے دوران کسی سے ملاقات نہ کرائیں، جبکہ پولیس کو ہدایت کی گئی ہے کہ وہ 18 جون سے قبل شناخت پریڈ کی رپورٹ عدالت میں جمع کرائیں۔
