ممبئی : ممبئی ہائیکورٹ نے 2006 میں ممبئی میں ہونے والے تباہ کن ٹرین بم دھماکوں کے 12 ملزمان کو عدم شواہد کی بنا پر بری کر دیا ہے۔ اس فیصلے کے بعد 11 ملزمان کو جیل سے رہا کیا جائے گا جبکہ ایک ملزم اپیل کے دوران انتقال کر چکا تھا۔
یہ بم دھماکے جولائی 2006 میں ہوئے تھے جن میں 189 افراد جان بحق اور 827 زخمی ہوئے تھے۔ ٹرائل کورٹ نے 2015 میں 5 ملزمان کو سزائے موت اور دیگر کو مختلف سزائیں سنائی تھیں۔ تاہم، ملزمان نے ہائیکورٹ میں سزا کے خلاف اپیل دائر کی تھی۔ممبئی ہائیکورٹ نے اپنے فیصلے میں کہا کہ پراسیکیوشن ملزمان کے خلاف جرم ثابت کرنے میں ناکام رہی اور شواہد نہ ہونے کی وجہ سے ملزمان کو بری کیا جاتا ہے۔ عدالت نے کہا کہ ملزمان کی جانب سے دی گئی اپیلیں درست ثابت ہوئیں اور سزا منسوخ کی جاتی ہے۔
