ڈیرہ غازی خان: پنجاب پولیس نے کامیاب آپریشن کے دوران ٹارگٹ کلنگ اور سنگین جرائم میں انتہائی مطلوب دہشت گرد بلال کھوسہ کو ہلاک کر دیا۔ ترجمان پنجاب پولیس کے مطابق یہ واقعہ رات گئے تھانہ کالا کی حدود میں پیش آیا، جہاں پولیس کی ٹیم معمول کے گشت پر تھی۔
پولیس کے مطابق، اس دوران نامعلوم مسلح افراد نے جھاڑیوں میں چھپ کر اہلکاروں پر اندھا دھند فائرنگ شروع کر دی، جس پر پولیس اہلکاروں نے بہترین حکمت عملی اپناتے ہوئے محفوظ پوزیشنز لیتے ہوئے جوابی کارروائی کی۔ فائرنگ کے تبادلے میں ایک حملہ آور ہلاک ہو گیا، جس کی شناخت بلال عرف بشیر کے نام سے ہوئی۔ بلال کھوسہ کے دیگر ساتھی فرار ہونے میں کامیاب ہو گئے، جن کی تلاش کے لیے پولیس نے سرچ آپریشن شروع کر دیا ہے۔
حکام کے مطابق بلال کھوسہ متعدد سنگین جرائم میں ملوث تھا، جن میں اقدامِ قتل، ڈکیتی، راہزنی، دہشت گردی، اور دوہرے قتل جیسے مقدمات شامل ہیں۔ وہ سی ٹی ڈی کے زیرِ تفتیش بھی تھا اور دو مقدمات میں باقاعدہ نامزد تھا۔ انٹیلی جنس رپورٹس کے مطابق بلال کھوسہ کا تعلق دہشت گرد تنظیم ٹی ٹی پی (تحریک طالبان پاکستان) سے تھا، اور وہ ریاستی اداروں کے خلاف منظم دہشت گرد کارروائیوں میں ملوث تھا۔پنجاب پولیس کے ترجمان نے بتایا کہ بلال کھوسہ کا مقصد ڈیرہ غازی خان میں بدامنی پھیلانا تھا، تاہم پولیس کی بروقت کارروائی سے اس کے مذموم عزائم ناکام بنا دیے گئے۔
آئی جی پنجاب پولیس ڈاکٹر عثمان انور نے اس کامیاب آپریشن پر ڈیرہ غازی خان پولیس کو شاباش دیتے ہوئے کہا کہ یہ آپریشن دہشت گردوں کے خلاف پنجاب پولیس کی مضبوط کارروائی کا واضح ثبوت ہے۔
