امریکی سینیٹ کے بعد ایوان نمائندگان میں بھی حکومتی اخراجات سے متعلق بل منظور کر دیا گیا، جس کے بعد یکم اکتوبر سے جاری امریکی تاریخ کا طویل ترین شٹ ڈاؤن ختم ہو گیا۔
ایوان نمائندگان میں 6 ڈیموکریٹس سمیت 222 ارکان نے بل کی حمایت میں ووٹ دیا جبکہ 2 ریپبلکن سمیت 209 ارکان نے بل کی مخالفت کی۔ امریکی میڈیا کے مطابق بل دستخط کے لیے امریکی صدر ڈونلڈ ٹرمپ کو بھیج دیا گیا ہے۔
عارضی فنڈنگ بل کی منظوری سے حکومت کے لیے 30 جنوری تک فنڈز فراہم کیے جا سکیں گے، جس سے وفاقی مالی سرگرمیاں بغیر رکاوٹ جاری رہ سکیں گی۔ اس بل کے تحت غذائی امدادی اسکیموں کی بحالی، سرکاری ملازمین کی تنخواہوں کی ادائیگی اور ائیر ٹریفک کنٹرول نظام کی دوبارہ فعال کاری ممکن ہو سکے گی۔
یہ اقدام امریکی قانون سازوں کی طرف سے طویل مالی بحران اور وفاقی خدمات میں خلل کے بعد اٹھایا گیا، جس نے ملک بھر میں سرکاری اداروں کی کارکردگی کو متاثر کیا تھا۔
