کینیڈا میں جی سیون ممالک کے وزرائے خارجہ کا اہم اجلاس منعقد ہوا جس میں امریکی صدر ڈونلڈ ٹرمپ کے غزہ منصوبے کی حمایت کا اعادہ کیا گیا۔
اجلاس کے بعد جاری کیے گئے مشترکہ اعلامیے میں وزرائے خارجہ نے اسرائیلی یرغمالیوں کی باقیات کی فوری واپسی پر زور دیا اور کہا کہ انسانی بنیادوں پر یہ اقدام ناگزیر ہے۔ وزراء نے غزہ میں امداد پہنچانے میں حائل رکاوٹوں پر گہری تشویش کا اظہار کرتے ہوئے تمام فریقین سے مطالبہ کیا کہ وہ انسانی امداد کی ترسیل کو بڑے پیمانے پر اور بغیر کسی رکاوٹ کے ممکن بنائیں تاکہ متاثرہ شہریوں تک ضروری سامان پہنچایا جا سکے۔
اعلامیے میں یوکرین اور روس کے درمیان جاری جنگ پر بھی گفتگو ہوئی۔ وزرائے خارجہ نے یوکرین کے توانائی ڈھانچے پر روس کے حملوں کی سخت مذمت کرتے ہوئے فوری جنگ بندی پر زور دیا۔ ان کا کہنا تھا کہ یوکرین کے شہری انفراسٹرکچر کی تباہی عالمی امن کے لیے ایک بڑا خطرہ ہے جس کا فوری حل نکالنا ضروری ہے۔
برطانیہ نے اس موقع پر یوکرین کی مدد کے لیے 17 ملین ڈالر کی مالی امداد کا اعلان کیا جو بجلی، پانی اور توانائی کے دیگر بنیادی ڈھانچوں کی بحالی کے منصوبوں میں استعمال ہوگی۔ جی سیون وزراء نے اس عزم کا اظہار کیا کہ وہ یوکرین کی تعمیر نو، عالمی امن اور انسانی حقوق کے فروغ کے لیے اپنی مشترکہ کوششیں جاری رکھیں گے۔
