ماہرین کے مطابق انڈے فریج کے اندر آسانی سے 3 سے 5 ہفتوں تک محفوظ رکھے جاسکتے ہیں۔
یعنی کچھ ہفتوں سے انڈے فریج میں موجود ہیں تو ضروری نہیں کہ وہ خراب ہوگئے ہوں۔
ماہرین کے مطابق انڈوں کی شیلف لائف کافی طویل ہوتی ہے، خاص طور پر اگر انہیں فریج میں درست طریقے سے محفوظ کیا جائے۔
ان کے مطابق انڈوں کو فریج کے دروازے کی بجائے سب سے ٹھنڈے حصے میں رکھنا بہتر ہوتا ہے۔
مگر اس وقت بہت زیادہ جھنجھلاہٹ ہوتی ہے جب انڈے کو پکانے کے لیے توڑا جائے اور وہ خراب نکل آئے۔
خراب انڈے کو اگر کسی پکوان میں ڈال دیا جائے تو اسے بھی ضائع کرنا پڑتا ہے۔
مگر آپ انڈہ توڑنے سے پہلے جان سکتے ہیں کہ وہ خراب ہے یا نہیں۔
جی ہاں واقعی ایسا بہت آسانی سے ممکن ہے۔
اس کے لیے آپ کو ایک گلاس ٹھنڈے پانی کی ضرورت ہوگی۔
اس کے بعد انڈے کو پانی کے اندر ڈال دیں۔
اگر وہ انڈہ اپنی سائیڈ کی جانب ڈوب جائے تو اس کا مطلب ہے کہ وہ بالکل ٹھیک ہے۔
اگر انڈہ ڈوب جائے مگر سیدھا کھڑا ہو تو بھی وہ کھانے کے لیے ٹھیک ہے۔
البتہ اگر انڈہ پانی میں جاتے ہی سطح پر تیرنے لگے تو اس کا مطلب ہے کہ وہ خراب ہوچکا ہے اور اسے توڑنے سے پہلے ہی پھینک دینا بہتر ہے۔
ماہرین کے مطابق یہ ٹیسٹ اس لیے کارآمد ہے کیونکہ زیادہ وقت گزرنے کے ساتھ انڈے کے اندر ہوا جمع ہونے لگتی ہے جس کے باعث وہ پانی میں جاکر تیرنے لگتا ہے۔