پاکستان کرکٹ بورڈ کی یقین دہانی کے بعد سری لنکن کرکٹ ٹیم نے دورہ پاکستان جاری رکھنے کا فیصلہ کر لیا ہے۔
قبل ازیں سری لنکن ٹیم کے مینجر نے بیان دیا تھا کہ کھلاڑی دورہ پاکستان ادھورا چھوڑ کر واپس جانا چاہتے ہیں، تاہم ذرائع کے مطابق پاکستان کرکٹ بورڈ نے ون ڈے سیریز اور ٹرائی سیریز کو برقرار رکھنے کے لیے ہر ممکن کوشش کی اور ٹیم کی سکیورٹی بڑھانے کی یقین دہانی کروائی۔
پی سی بی کی یقین دہانی کے بعد سری لنکن ٹیم نے دورہ جاری رکھنے کا حتمی فیصلہ کیا۔ سری لنکن کرکٹ بورڈ نے کہا ہے کہ اگر کوئی کھلاڑی دورہ جاری نہیں رکھنا چاہتا تو اس کا متبادل فراہم کیا جائے گا۔ چیئرمین پی سی بی محسن نقوی نے سری لنکن کھلاڑیوں اور عملے کو سکیورٹی انتظامات کی یقین دہانی کروائی اور کہا کہ ٹیم اور عملے کی حفاظت ہماری اولین ترجیح ہے۔
ذرائع کے مطابق پاکستان اور سری لنکا کے درمیان دوسرا ون ڈے شیڈول کے مطابق کل راولپنڈی میں ہوگا۔ واضح رہے کہ سری لنکا کو پاکستان کے خلاف بقیہ 2 ون ڈے میچز کھیلنے ہیں اور اس کے بعد پاکستان میں سہ ملکی سیریز بھی شیڈول ہے۔
