بھارت کی سابقہ ٹینس اسٹار ثانیہ مرزا نے اپنی زندگی کے مشکل ترین وقت پر بات کی۔
ثانیہ نے اپنی بہترین دوست اور معروف فلم ساز فرح خان کے ساتھ ’سرونگ اِٹ اپ ود ثانیہ‘ میں گفتگو کرتے ہوئے طلاق کے بعد پیش آنے والی مشکلات پر بات کی۔ بیٹے کی اکیلے پرورش میں مشکلات سے متعلق فرح خان نے کہا کہ ثانیہ اب سنگل مدر ہیں، اور سنگل مدر ہونے سے زیادہ مشکل کام اور کوئی نہیں۔ انہوں نے کہا کہ ہر شخص کی اپنی زندگی کا سفر ہوتا ہے اور ہمیں یہ فیصلہ کرنا ہوتا ہے کہ ہمارے لیے بہترین کیا ہے۔
اس دوران ثانیہ نے اعتراف کیا کہ ماں بننا، کام کرنا اور پڑھنا اکثر انہیں تھکا دیتا ہے۔ انہوں نے مزید بتایا کہ ایک موقع ایسا بھی آیا جب وہ بہت تکلیف میں تھیں اور فرح خان ان کے سیٹ پر آئیں، جس کے بعد وہ لائیو شو کر پائیں، اگر فرح نہ آتیں تو وہ شو نہیں کر پاتیں۔
فرح خان نے کہا کہ وہ بہت ڈری تھیں کیونکہ انہوں نے ثانیہ کو پہلے کبھی پینک اٹیک (گھبراہٹ کے دورے) میں نہیں دیکھا تھا، اور اس دوران انہوں نے ثانیہ کو ان کے سب سے مشکل وقت میں دیکھا۔
واضح رہے کہ شعیب ملک اور ثانیہ مرزا کے درمیان 2024 میں طلاق ہوگئی تھی، اور دونوں کا ایک بیٹا اذہان مرزا ملک ہے۔
