اسلام آباد: وفاقی وزیر خزانہ سینیٹر محمد اورنگزیب نے کہا ہے کہ زیادہ آبادی مسائل اور غربت کا باعث بنتی ہے، لہٰذا ترقی کی رفتار بڑھانے کے لیے آبادی کا کنٹرول ناگزیر ہے۔
انہوں نے پاپولیشن کونسل کی تقریب سے خطاب میں کہا کہ بڑھتی آبادی مسائل کو جنم دیتی ہے اور ہمیں آبادی کے مطابق وسائل کا انتظام کرنا ہوتا ہے۔ محمد اورنگزیب نے کہا کہ پاکستان کی معیشت مثبت سمت میں گامزن ہے، اور آبادی و معیشت ایک دوسرے سے جڑے چیلنج ہیں، اس لیے پائیدار ترقی کے لیے متوازن آبادی ضروری ہے۔
وفاقی وزیر خزانہ نے موسمیاتی تبدیلی کو بھی عصر حاضر کا بڑا چیلنج قرار دیا اور کہا کہ حکومت کی توجہ ماحول دوست معیشت پر مرکوز ہے۔ انہوں نے کچی آبادیاں بھی مسائل کا سبب قرار دیتے ہوئے کہا کہ ان کا کوئی مکمل ڈیٹا حکومت کے پاس نہیں ہوتا، اور ترقی کی رفتار بڑھانے کے لیے آبادی کا کنٹرول لازمی ہے۔
