راولپنڈی: بانی تحریک انصاف عمران خان کی بہن علیمہ خان کے نام موجود جائیداد کی تفصیلات عدالت میں پیش کر دی گئی ہیں۔
راولپنڈی کی انسداد دہشتگردی عدالت میں علیمہ خان سمیت 11 ملزمان کے خلاف 26 نومبر کے احتجاج پر درج مقدمے کی سماعت ہوئی، جہاں علیمہ خان اور ان کے وکلا آج بھی پیش نہیں ہوئے۔ عدالت نے مسلسل غیرحاضری پر دسویں مرتبہ علیمہ خان کے ناقابل ضمانت وارنٹ گرفتاری جاری کر دیے ہیں۔
علیمہ خان کی جائیداد کے حوالے سے پنجاب ریونیو بورڈ نے 38 اضلاع کے ڈی سیز کی رپورٹ عدالت میں جمع کرائی۔ رپورٹ کے مطابق:
- ضلع بھکر میں 51 کنال 16 مرلے, ضلع لاہور، موضع میر میں ایک کنال 4 مرلے, موضع نورپور کمبواں لاہور میں ایک کنال, تحصیل رائے ونڈ، موضع سلطان میں 64 کنال 14 مرلے, ضلع میانوالی میں 217 کنال 5 مرلے, موضع بازار شیخوپورہ میں 4 کنال 13 مرلے اس کے علاوہ پنجاب کے چار اضلاع میں کل 338 کنال اراضی علیمہ خان کے نام ہے۔
سماعت کے دوران پراسیکیوٹر ظہیر شاہ نے علیمہ خان کی مسلسل غیرحاضری پر ان کی پراپرٹی سیل کرنے کی استدعا کی اور بتایا کہ عدالتی حکم پر علیمہ خان کے مختلف بینکوں میں 37 اکاؤنٹ فریز کر دیے گئے ہیں۔ عدالت نے علیمہ خان کے ایک نجی بینک کے 15 اور دوسرے بینک کا ایک اکاؤنٹ فریز کرنے کے بھی احکامات جاری کیے۔
بعد ازاں عدالت نے مقدمے کی سماعت 29 نومبر تک ملتوی کر دی۔
واضح رہے کہ علیمہ خان سمیت 11 ملزمان کے خلاف تھانہ صادق آباد میں انسداد دہشتگردی دفعات کے تحت مقدمہ درج ہے، جس میں علیمہ خان پر 26 نومبر کے احتجاج میں جلاؤ، گھیراؤ، کار سرکار میں مداخلت اور کارکنوں کو پرتشدد احتجاج پر اکسانے کا الزام ہے۔
