اسلام آباد: پاکستان اور چین نے انسداد دہشتگردی اور سیکیورٹی تعاون کو مزید مضبوط بنانے پر اتفاق کرلیا۔
وفاقی وزیر داخلہ محسن نقوی سے چینی سفیر کی ملاقات میں پاک-چین دوطرفہ تعلقات اور باہمی دلچسپی کے امور پر تبادلہ خیال کیا گیا۔ ملاقات کے دوران انسداد دہشتگردی اور سیکیورٹی تعاون کو مزید بہتر بنانے پر اتفاق رائے قائم ہوا۔
چینی سفیر نے اسلام آباد میں حالیہ خودکش حملے کی مذمت کی اور قیمتی انسانی جانوں کے ضیاع پر افسوس کا اظہار کیا۔ چینی وزارت خارجہ کے ترجمان نے بھی اس واقعے کی شدید مذمت کی ہے اور پاکستان کے ساتھ بھرپور تعاون جاری رکھنے کا اعادہ کیا ہے۔
وزیر داخلہ محسن نقوی نے کہا کہ پاک-چین تعلقات باہمی اعتماد اور احترام پر مبنی ہیں، اور چین پاکستان کا وہ قابل اعتماد دوست ہے جس نے ہر مشکل وقت میں ساتھ دیا ہے۔
