کراچی کے علاقے کورنگی مہران ٹاؤن میں کھلے مین ہول میں گرنے سے 8 سالہ بچہ جاں بحق ہو گیا۔
پولیس کے مطابق یہ افسوسناک واقعہ تھانہ کورنگی انڈسٹریل ایریا کی حدود میں پیش آیا۔ جاں بحق بچے کی لاش جناح اسپتال منتقل کر دی گئی ہے۔ پولیس کے مطابق بچے کا والد مزدوری کرتا ہے۔ اطلاع ملتے ہی ایس ایس پی کورنگی جائے حادثہ پر پہنچ کر صورتحال کا جائزہ لیا۔
اہلِ خانہ کا کہنا ہے کہ بچہ گھر کے باہر کھیل رہا تھا کہ کھلے گٹر میں گر گیا۔ بچے کے چچا نے فوری طور پر اسے مین ہول سے باہر نکالا، تاہم وہ جانبر نہ ہو سکا۔
پولیس اور متعلقہ ادارے موقع پر پہنچ کر قانونی کارروائی اور مزید تحقیقات کر رہے ہیں تاکہ حادثے کی وجوہات اور ذمہ داروں کا تعین کیا جا سکے۔
