روسی وزیرِ خارجہ نے دعویٰ کیا ہے کہ روسی فوج نے صدر ولادیمیر پیوٹن کی رہائش گاہ پر یوکرین کے ڈرون حملے کو ناکام بنا دیا۔
روسی وزارت خارجہ کے مطابق یہ حملہ 29 دسمبر کی شب نووگورود کے علاقے میں کیا گیا، جہاں یوکرین کی جانب سے 91 ڈرونز داغے گئے۔ روسی فضائی دفاعی نظام نے بروقت کارروائی کرتے ہوئے تمام ڈرونز کو تباہ کر دیا، جس کے نتیجے میں صدر پیوٹن کی رہائش گاہ کو کوئی نقصان نہیں پہنچا اور سیکیورٹی صورتحال مکمل طور پر کنٹرول میں رہی۔
روسی وزیرِ خارجہ کا کہنا تھا کہ یوکرین کی جانب سے یہ حملہ روس کی مذاکراتی حکمتِ عملی پر دوبارہ غور کرنے کا سبب بنے گا۔
دوسری جانب کریملن نے صدر پیوٹن اور امریکی صدر ڈونلڈ ٹرمپ کی ٹیلی فونک گفتگو کی تفصیلات جاری کی ہیں۔ صدر پیوٹن نے امریکی صدر کو بتایا کہ روس امن قائم رکھنے کے لیے امریکا کے ساتھ تعاون جاری رکھے گا اور یوکرینی ڈرون حملے کے بعد صورتحال پر قابو پایا گیا۔ صدر ٹرمپ نے اس حملے کی خبر سن کر تشویش کا اظہار کیا اور کہا کہ یہ واقعہ امریکی رویے اور یوکرین کے صدر زلنسکی کے ساتھ تعلقات پر اثر ڈال سکتا ہے۔
