لاہور: بسنت کی اجازت کے لیے جاری ڈپٹی کمشنر لاہور کے نوٹیفکیشن کو لاہور ہائیکورٹ میں چیلنج کر دیا گیا ہے۔
لاہور ہائیکورٹ میں یہ متفرق درخواست ایڈوکیٹ اظہر صدیق نے دائر کی ہے۔ درخواست میں موقف اختیار کیا گیا ہے کہ ماضی میں پتنگ کی ڈور پھڑنے کے واقعات میں کئی قیمتی جانوں کا نقصان ہوا ہے۔ ڈپٹی کمشنر لاہور نے چھ، سات اور آٹھ فروری کو بسنت کی اجازت کے لیے نوٹیفکیشن جاری کیا تھا۔
درخواست میں مزید کہا گیا ہے کہ گزشتہ چند دنوں میں پتنگ کی ڈور پھڑنے کے نتیجے میں ایک بچی اور ایک نوجوان شدید زخمی ہو چکے ہیں۔ درخواست گزار نے عدالت سے استدعا کی ہے کہ مرکزی درخواست کے حتمی فیصلے تک ڈپٹی کمشنر کا نوٹیفکیشن معطل کیا جائے تاکہ ممکنہ حادثات سے بچا جا سکے۔
