راولپنڈی: جی ایچ کیو حملہ اور 9 مئی کے 13 مقدمات کی سماعت ایک بار پھر ملتوی ہو گئی، جبکہ عدالت نے ملزمان پر فردِ جرم عائد کرنے کے لیے نئی تاریخ مقرر کر دی۔
انسداد دہشت گردی عدالت کے جج امجد علی شاہ کے روبرو سانحہ 9 مئی کے 13 مقدمات اور جی ایچ کیو حملہ کیس کی سماعت ہوئی، جس میں سرکاری پراسیکیوٹر، وکلاء صفائی ملک فیصل اور ان کی ٹیم، ملزمان سمیت دیگر قانونی نمائندے عدالت میں موجود تھے۔ علاوہ ازیں رکن قومی اسمبلی شاندانہ گلزار، سابق وزیر داخلہ اور عوامی مسلم لیگ کے سربراہ شیخ رشید احمد، سپرنٹنڈنٹ اڈیالہ جیل، زرتاج گل اور علیمہ خان بھی کمرہ عدالت میں پہنچے، جہاں شیخ رشید نے حاضری لگوا کر عدالت سے روانگی اختیار کی۔
سماعت کے دوران جی ایچ کیو حملہ کیس کے گواہوں کی غیر حاضری کی وجہ سے جیل ٹرائل ایک بار پھر ملتوی ہو گیا۔ اس کے علاوہ 26 نومبر تحریک انصاف کے احتجاج سے متعلق 23 مقدمات میں ملزمان کو چالان کی نقول فراہم کی گئیں۔ اسی طرح 9 مئی کے 11 مقدمات میں بھی حاضر ملزمان کو چالان کی نقول تقسیم کی گئیں۔
عدالت نے 26 نومبر تحریک انصاف کے احتجاج سے متعلق 32 مقدمات کی سماعت 3 جون تک ملتوی کرتے ہوئے آئندہ تاریخ پر ملزمان پر فردِ جرم عائد کرنے کا فیصلہ کیا۔
