ملک بھر میں مون سون بارشوں کا دوسرا اسپیل اگلے ماہ سے اثر انداز ہوگا۔
محکمہ موسمیات کے مطابق شہرِ قائد میں آج مطلع جزوی ابر آلود رہنے کے ساتھ ساتھ بارش اوربوندا باندی کا امکان ہے۔محکمہ موسمیات کا بتانا ہے کہ کراچی میں زیادہ سے زیادہ درجہ حرارت 32 ڈگری ریکارڈ کیا گیا، ہوا میں نمی کا تناسب 83 فیصد ہے اور شمال مشرق سے 11کلومیٹر فی گھنٹہ کی رفتار سے ہوا چل رہی ہے۔ اس کے علاوہ آج سندھ میں کہیں کہیں بارش کی پیشگوئی کی گئی ہے۔محکمہ موسمیات کے مطابق مون سون بارشوں کا دوسرا اسپیل 5 جولائی سے ملک پر اثرانداز ہوگا۔
ہفتے کی شام کراچی میں بارش
کراچی کے مختلف علاقوں میں ہفتے کی شام موسلا دھار بارش ہوئی۔ گرومندر چورنگی، ماڈل کالونی اور باغِ کورنگی روڈ پر بارش کا پانی جمع ہے۔ دو روز کے دوران بارش کے باعث کرنٹ لگنے سمیت مختلف حادثات میں 8 افراد جاں بحق اور 7 زخمی ہوچکے ہیں ۔
