اسلام آباد: پاکستان کے مایہ ناز سپوت، پائلٹ آفیسر راشد منہاس شہید (نشانِ حیدر) کی 54 ویں برسی کے موقع پر پاکستان کی مسلح افواج نے انہیں بھرپور خراجِ عقیدت پیش کیا ہے۔
پاک فوج کے شعبہ تعلقات عامہ (آئی ایس پی آر) کا کہنا ہے کہ چیف آف آرمی سٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے راشد منہاس شہید کو قوم کا ہیرو قرار دیتے ہوئے ان کی قربانی کو سراہا۔
آئی ایس پی آر کے بیان میں کہا گیا کہ پائلٹ آفیسر راشد منہاس نے 20 اگست 1971 کو مادرِ وطن کی خودمختاری کے تحفظ کے لیے اپنی جان کا نذرانہ پیش کیا۔ ان کا ناقابلِ تسخیر جذبہ، وفاداری اور حب الوطنی نہ صرف مسلح افواج بلکہ پوری قوم کے لیے ایک روشن مثال ہے۔ترجمان کے مطابق، راشد منہاس کی بہادری اور قربانی ہمیں اس بات کا احساس دلاتی ہے کہ آزادی کی کیا قیمت ہوتی ہے، اور وطن کے دفاع کے لیے کس قدر حوصلہ درکار ہوتا ہے۔ ان کی شہادت نے دشمن کے ناپاک عزائم کو خاک میں ملا دیا اور پاکستان کی فضائیہ کی تاریخ کو ایک ناقابلِ فراموش باب بخشا۔
آئی ایس پی آر نے مزید کہا کہ راشد منہاس کا نام تاریخ میں ہمیشہ وفا، حوصلے اور قومی فخر کی علامت کے طور پر یاد رکھا جائے گا۔ مسلح افواج نے ان کی قربانی کو سلام پیش کرتے ہوئے اس عزم کا اعادہ کیا کہ وطن کے دفاع کے لیے جانوں کے نذرانے پیش کرنے والوں کو ہمیشہ یاد رکھا جائے گا۔
