صدر مملکت آصف علی زرداری اور وزیراعظم شہباز شریف نے بنگلا دیش کی سابق وزیر اعظم خالدہ ضیا کے انتقال پر اظہار تعزیت کیا ہے۔ دونوں رہنماؤں نے مرحومہ کے اہل خانہ اور بنگلا دیشی عوام کے لیے صبر و استقامت کی دعا کی۔
صدر مملکت نے اپنے تعزیتی پیغام میں کہا کہ بیگم خالدہ ضیا کے انتقال پر انتہائی افسوس ہوا، اور بنگلا دیش کے لیے ان کی سیاسی خدمات کو احترام کے ساتھ یاد رکھا جائے گا۔
وزیراعظم شہباز شریف نے کہا کہ بیگم خالدہ ضیا پاکستان کی مخلص دوست تھیں اور پاکستانی حکومت و عوام دکھ کی اس گھڑی میں بنگلا دیشی عوام کے ساتھ ہیں۔
نائب وزیراعظم اسحاق ڈار نے بھی مرحومہ کے انتقال پر دلی تعزیت کا اظہار کرتے ہوئے دعا کی کہ اللہ تعالیٰ خالدہ ضیا کو جنت الفردوس میں اعلیٰ مقام عطا فرمائے۔
