لاہور: جنگی جنون میں مبتلا بھارت نے پاکستانی سرحد کے قریب گجرات میں فضائی مشقوں کا اعلان کر دیا ہے۔
بھارتی ائیر فورس نے پاکستانی سرحد سے ملحقہ گجرات کے علاقے کچھ میں بڑے پیمانے پر فضائی مشقیں کرنے کا اعلان کیا ہے۔ اس سلسلے میں 20 جنوری سے 21 جنوری تک فضائی حدود کو بین الاقوامی پروازوں کے لیے بند کر کے انڈین ائیر فورس کی مشقوں کے لیے مختص کرنے کا نوٹس ٹو ایئر مین (نوٹم) بھی جاری کر دیا گیا ہے۔
بھارتی میڈیا کے مطابق ان فضائی مشقوں میں رافیل، سخوئی 30 ایم کے آئی، جیگوار سمیت دیگر فرنٹ لائن لڑاکا طیارے حصہ لیں گے۔ رپورٹس کے مطابق مشقوں کے دوران تیز رفتار پروازیں، ہوائی لڑائی کی تربیت اور ممکنہ طور پر لائیو فائرنگ یا بمباری کی مشقیں بھی شامل ہوں گی۔
بھارتی میڈیا رپورٹس میں یہ بھی بتایا گیا ہے کہ محدود فضائی زون پاکستان کے ساتھ بھارت کی جنوبی سرحد کے حساس علاقوں پر محیط ہے، جن میں بحیرہ عرب، سر کریک، راجکوٹ اور احمد آباد کے قریبی علاقے شامل ہیں۔
