امریکا کے شہر نیویارک کے پہلے مسلمان میئر ظہران ممدانی نے قرآن پاک پر حلف اٹھا کر اپنے عہدے کا باضابطہ آغاز کر دیا۔
غیر ملکی میڈیا کے مطابق ظہران ممدانی کی حلف برداری کی تقریب نیویارک سٹی ہال میں منعقد ہوئی جہاں انہوں نے قرآن پاک پر عہدے کا حلف لیا۔ نیویارک کی اٹارنی جنرل لیٹیا جیم نے ان سے حلف لیا، اس موقع پر ظہران ممدانی کی اہلیہ بھی تقریب میں موجود تھیں۔
تقریب کے دوران مختلف سیاسی، سماجی اور مذہبی شخصیات نے شرکت کی اور ظہران ممدانی کو نیویارک کے 112 ویں میئر کی حیثیت سے ذمہ داریاں سنبھالنے پر مبارکباد دی۔ ظہران ممدانی کا کہنا تھا کہ وہ نیویارک کے تمام شہریوں کی بلا تفریق خدمت کریں گے اور شہر میں مساوات، انصاف اور ترقی کے لیے عملی اقدامات کیے جائیں گے۔
یاد رہے کہ ڈیموکریٹک پارٹی سے تعلق رکھنے والے ظہران ممدانی 4 نومبر 2025 کو ہونے والے میئر کے انتخابات میں 50.78 فیصد ووٹ حاصل کر کے کامیاب ہوئے تھے۔ وہ نیویارک کی تاریخ کے پہلے مسلمان میئر ہیں۔ انتخابی مہم کے دوران سابق امریکی صدر ڈونلڈ ٹرمپ نے انہیں نسلی تعصب کا نشانہ بھی بنایا تھا، تاہم الیکشن میں ریپبلکن امیدوار کی شکست کے بعد ڈونلڈ ٹرمپ نے ظہران ممدانی کو مبارکباد دی اور نیویارک کی بہتری کے لیے مل کر کام کرنے کے عزم کا اظہار کیا۔
یہ پیش رفت نہ صرف نیویارک بلکہ دنیا بھر میں رہنے والے مسلمانوں کے لیے بھی ایک اہم اور تاریخی لمحہ قرار دی جا رہی ہے۔
