چیف آف ڈیفنس فورسز فیلڈ مارشل عاصم منیر نے کہا ہے کہ بھارتی اسپانسرڈ پراکسیز کی جانب سے بلوچستان میں تشدد اور بدامنی کا منظم پروپیگنڈا جاری ہے، تاہم پاکستان کی علاقائی سالمیت کی کسی بھی بلاواسطہ یا بالواسطہ خلاف ورزی پر سخت اور فیصلہ کن جواب دیا جائے گا۔
پاک فوج کے شعبہ تعلقات عامہ آئی ایس پی آر کے مطابق فیلڈ مارشل عاصم منیر سے بلوچستان سے متعلق 18ویں نیشنل ورکشاپ کے شرکاء نے ملاقات کی۔ اس موقع پر شرکاء سے خطاب کرتے ہوئے فیلڈ مارشل نے کہا کہ دشمن عناصر بلوچستان میں ترقی کے عمل کو سبوتاژ کرنے کی کوشش کر رہے ہیں اور بھارتی حمایت یافتہ پراکسیز صوبے میں تشدد، انتشار اور بے چینی کو ہوا دے رہی ہیں۔
فیلڈ مارشل عاصم منیر نے واضح کیا کہ پاکستان کی مسلح افواج ملک کے ہر انچ کے دفاع اور شہریوں کی جان و مال کے تحفظ کے لیے مکمل طور پر پرعزم ہیں۔ انہوں نے کہا کہ بھارتی اسپانسرڈ پراکسیز کے مذموم عزائم کو سکیورٹی فورسز اپنی مؤثر اور سخت کارروائیوں سے ناکام بنائیں گی اور بلوچستان کو دہشت گردی اور عدم استحکام سے پاک کیا جائے گا۔
آئی ایس پی آر کے مطابق فیلڈ مارشل نے بلوچستان کی ترقی، خوشحالی اور پاکستان کے لیے اس کی اسٹریٹجک اہمیت پر بھی زور دیا۔ انہوں نے کہا کہ بلوچستان کے عوام کی حوصلہ مندی، قربانیاں اور حب الوطنی قابلِ تحسین ہیں۔ وفاقی اور صوبائی حکومتیں عوامی مرکزیت پر مبنی ترقیاتی منصوبوں پر کام کر رہی ہیں تاکہ صوبے میں دیرپا امن اور معاشی استحکام کو یقینی بنایا جا سکے۔
چیف آف ڈیفنس فورسز نے اس بات پر بھی زور دیا کہ سول سوسائٹی کا کردار دشمن کے جھوٹے پروپیگنڈے کو بے نقاب کرنے میں انتہائی اہم ہے۔ ان کا کہنا تھا کہ ذاتی سیاسی ایجنڈوں کو یکسر مسترد کرنا ہوگا تاکہ بلوچستان کا مستقبل طویل المدتی خوشحالی، امن اور ترقی سے جڑا ہو۔
فیلڈ مارشل عاصم منیر نے ایک بار پھر اس عزم کا اعادہ کیا کہ بھارتی حمایت یافتہ عناصر کی جانب سے پھیلائی جانے والی بے امنی کو ہر صورت روکا جائے گا اور پاکستان کی علاقائی سالمیت پر کسی بھی حملے یا سازش کا بھرپور اور فیصلہ کن جواب دیا جائے گا۔ انہوں نے کہا کہ پاکستان آرمی شہریوں کے تحفظ کے لیے ہر وقت تیار ہے اور کسی قسم کی قربانی سے دریغ نہیں کیا جائے گا۔
آئی ایس پی آر کے مطابق سیشن کے اختتام پر سوال و جواب کی نشست بھی ہوئی جس میں فیلڈ مارشل عاصم منیر نے شرکاء کے سوالات کے تفصیلی جوابات دیے۔
