کراچی میں گزشتہ سال کے مقابلے میں رواں سال کتوں کے کاٹنے کے کیسز میں اضافہ ہوا ہے۔
ریبیز کلینک انچارج ڈاکٹر رومانہ فرحت کا کہنا ہے کہ سول اسپتال میں جنوری اور فروری میں کتوں کے کاٹنے کے 5 ہزار 795 کیسز رپورٹ ہوچکے ہیں۔
ڈاکٹر رومانہ نے بتایا کہ سول اسپتال میں گزشتہ سال جنوری اور فروری میں کتوں کے کاٹنے کے 3 ہزار 269 کیسز رپورٹ ہوئے تھے جب کہ سول اسپتال میں کتوں کے کاٹنے کے یومیہ 100 سے زائد کیسز رپورٹ ہو رہے ہیں۔
اس حوالے سے ڈاکٹر عرفان صدیقی نےمزید بتایا کہ جناح اسپتال میں رواں سال کتوں کے کاٹنے کے 5 ہزار سے زائد کیسز رپورٹ ہوئے، جناح اسپتال میں گزشتہ سال کتوں کے کاٹنے کے 3 ہزار سے زائد کیسز سامنے آئے تھے۔
طبی ماہرین کے مطابق کتے کے کاٹنے پر فوری متاثرہ جگہ کو ڈیٹرجنٹ صابن سےکم از کم 15 منٹ دھونا چاہیے اور ساتھ ہی اینٹی ریبیز ویکسین اور حفاظتی ٹیکوں کا کورس مکمل کرنا چاہیے۔
