لاہور : وزیراعلیٰ پنجاب مریم نواز نے ہندو برادری کے تہوار ہولی کے موقع پر اپنے پیغام میں کہا ہے کہ اقلیتوں کے جان و مال کے تحفظ کو ریڈ لائن قرار دے کر یقینی بنایا جا رہا ہے۔ انہوں نے کہا کہ "رنگوں کا یہ خوبصورت تہوار ہولی محبت، امن اور بھائی چارے کی علامت ہے” اور پاکستان مختلف مذاہب کی برادریوں کا حسین امتزاج ہے، جہاں سب کو یکساں حقوق اور مواقع فراہم کیے جا رہے ہیں۔
مریم نواز نے مزید کہا کہ "پنجاب صوفیاء، محبت اور رواداری کی دھرتی ہے، یہاں ہر مذہب اور برادری کو مکمل احترام حاصل ہے۔” ان کا کہنا تھا کہ پنجاب کو ایسا بنایا جا رہا ہے جہاں ہر شہری خود کو محفوظ، بااختیار اور برابر کا پاکستانی محسوس کرے۔وزیراعلیٰ پنجاب نے اس بات کا بھی ذکر کیا کہ پنجاب حکومت اقلیتی برادری کے تحفظ اور فلاح و بہبود کے لیے عملی اقدامات کر رہی ہے۔ اقلیتی افراد کو تعلیم، صحت، روزگار اور دیگر بنیادی سہولتیں یکساں طور پر فراہم کی جا رہی ہیں۔انہوں نے کہا کہ "منیارٹی کارڈ کے ذریعے نادار اقلیتی بہن بھائیوں کی ہینڈ ہولڈنگ کی جارہی ہے، اقلیتوں کے مذہبی تہواروں کے لیے گرانٹس میں اضافہ کیا گیا ہے، اور ادارے کے بجٹ میں بھی اضافہ کیا گیا ہے۔”
