یوم پاکستان کے موقع پر ایوان صدر میں اعلیٰ ترین سول اعزازات دینے کی تقریب منعقد کی گئی، جس میں صدرمملکت آصف علی زرداری نے مختلف شعبہ ہائے زندگی میں نمایاں کارکردگی کا مظاہرہ کرنے والی شخصیات کو قومی اعزازات سے نوازا۔
ایوان صدر میں منعقدہ تقریب میں چیئرمین سینیٹ یوسف رضا گیلانی، چیئرمین پیپلزپارٹی بلاول بھٹو زرداری، خاتون اول آصفہ بھٹو اور دیگر اہم شخصیات نے شرکت کی۔صدر مملکت آصف زرداری نے سابق وزیراعظم اور پاکستان پیپلزپارٹی کے بانی ذوالفقار علی بھٹو کو بعد از وفات شاندار خدمات کے اعتراف میں اعلیٰ ترین سول ایوارڈ ’’نشان پاکستان‘‘ عطا کیا، ذوالفقار علی بھٹو کا اعلیٰ ترین سول اعزاز ان کی صاحبزادی صنم بھٹو نے وصول کیا۔
صدر مملکت نے ایئرمارشل (ر) راجا شاہد حامد مرحوم کو گراں قدرخدمات پر نشان امتیاز عطاء کیا، سلطان علی اکبر الانا کو مالیاتی شعبے میں گراں قدر خدمات پر ’’نشان خدمت‘‘ عطاء کیا گیا۔صدر مملکت کی جانب سے ایس پی محمد اعجاز خان شہید، ڈی ایس پی علامہ اقبال شہید، ڈی ایس پی سردار حسین شہید کو غیرمعمولی بہادری پر ’’ہلال شجاعت‘‘ سے نوازا گیا۔صدر مملکت نے کانسٹیبل جہانزیب شہید، کانسٹیبل ارشاد علی شہید، ایڈیشنل ایس ایچ او عدنان آفریدی شہید اور سب انسپکٹر تیمور شہزاد شہید کو بھی غیرمعمولی بہادری کے اعتراف میں ’’ہلال شجاعت‘‘ عطاء کیا۔
آصف زرداری نے ایل ایچ سی محمد فاروق شہید اور سپاہی محمد آصف شہید کو غیرمعمولی بہادری کے اعتراف میں ’’ہلال شجاعت‘‘ عطاء کیا۔تقریب میں اللہ رکھیو شہید کو شعبہ تعلیم میں شاندار خدمات کے اعتراف میں ہلال شجاعت عطاء کیا گیا، ڈاکٹر سید توقیر شاہ کو سول سروس، کیپٹن (ر) محمد خرم آغا اور سید علی حیدر گیلانی کو خدمات عامہ کے شعبے میں گرانقدر کارکردگی پر ’’ہلال امتیاز‘‘ سے نوازا گیا۔صدر مملکت آصف زرداری نے حسین داؤد کو انسان دوستی اور مفاد عامہ کے شعبے میں شاندار خدمات پر ’’ہلال امتیاز‘‘ سے نوازا جبکہ خواجہ انور مجید کو سماجی شعبے میں گرانقدر خدمات پر ’’ہلال امتیاز‘‘ عطا کیا جبکہ پروفیسر ڈاکٹر شہریار اور ڈاکٹر زریاب کو بھی شعبہ طب میں نمایاں خدمات پر ’’ہلال امتیاز‘‘ سے نوازا گیا۔
