عید پر کون نہیں چاہتا ہے انہیں عیدی ملے وہ بھی نئے نئے کرارے نوٹوں کے ساتھ، شہری اپنے پیاروں کو عیدی دینے کیلئے بینکوں سے نئے کرنسی نوٹ حاصل کرتے ہیں، کہا جاتا ہے عید بچوں کی ہوتی ہے اور بچوں کی عید نئے کرنسی نوٹوں کی صورت میں ملی عیدی کے بغیر ادھوری رہتی ہے۔
عید پر نئے کرنسی نوٹ حاصل کرنے کا آخر طریقۂ کار کیا ہے؟، نجی بینک کے افسر نے مقامی ویب سائٹ کو بتایا کہ بینک سے عید پر نئے کرنسی نوٹ حاصل کرنے کا طریقۂ کار بہت ہی سادہ سا ہے۔انہوں نے کہا کہ کرنسی نوٹ حاصل کرنے کا خواہشمند شخص اپنے شناختی کارڈ کی کاپی کے ہمراہ کسی بھی بینک جاکر براہ راست نئے کرنسی نوٹ حاصل کر سکتا ہے، اگر بینک کے پاس کرنسی نوٹ کا اسٹاک موجود ہو تو اسے فوری طور پر کرنسی نوٹ دے دیے جاتے ہیں۔
نجی بینک کے افسر کا کہنا ہے کہ اسٹیٹ بینک ہر سال کمرشل بینکوں کو نئے کرنسی نوٹ جاری کرتا ہے، اسٹیٹ بینک جتنے چاہے نوٹ دے سکتا ہے، اس پر کوئی بینک اسٹیٹ بینک سے یہ نہیں کہہ سکتا کہ کم کیوں دیئے یا مزید چاہئیں، بس اسٹیٹ بینک نے جتنے دے دیے اتنے ہی بینک قبول کرتے ہیں۔عید پر نئے کرنسی نوٹوں کے حوالے سے ان کا یہ بھی کہنا تھا کہ کہ اسٹیٹ بینک جتنے بھی بینکوں کو نوٹس دیتا ہے، وہ چند دنوں میں ہی ختم ہو جاتے ہیں، اس بار بھی ہمارے بینک میں پندرہویں روزے کو نئے کرنسی نوٹس آئے تھے جو چند دنوں میں ختم ہوگئے تھے۔
بینکرز کے مطابق نئے کرنسی نوٹ جلد ختم ہونے کی اصل وجہ یہ ہوتی ہے کہ کرنسی نوٹ زیادہ تر بینک کا عملہ اپنے ہی جاننے والوں میں تقسیم کردیتا ہے، اس لیے دیگر افراد کیلئے جو خاص طور پر عید کیلئے نئے کرنسی نوٹ لینے بینک کا رخ کرتے ہیں ان کے حصے میں کچھ نہیں آتا۔اسلام آباد میں حبیب بینک آئی 8 برانچ کے مینیجر رانا عمیر کہتے ہیں کہ 2 سے 3 برس قبل تک اسٹیٹ بینک خود نئے کرنسی نوٹ دیتا تھا، ایک کوڈ کے ذریعے عوام اسٹیٹ بینک سے رابطہ کرکے نئے کرنسی نوٹ حاصل کر لیتے تھے لیکن اب اس حوالے سے بے بنیاد خبریں چل رہی ہیں۔عمیر رانا کے مطابق اب اسٹیٹ بینک کی جانب سے بینکوں کو عید کے موقع پر نئے کرنسی نوٹ جاری کیے جاتے ہیں اور پھر عوام اب اسٹیٹ بینک کے بجائے دیگر بینکوں سے جاکر کرنسی نوٹ حاصل کرتے ہیں، جس کے لیے شناختی کارڈ کی کاپی درکار ہوتی ہے۔
ان کے خیال سے اسٹیٹ بینک کی جانب سے فی برانچ 8 سے 10 بنڈل 10 روپے والے، 3 سے 4 بنڈل 100 والے، 20 والے 1 سے 2 بنڈل اسی طرح 50 والے بھی ہوتے ہیں، 1 بنڈل میں 10 پیکٹ ہوتے ہیں، یعنی مجموعی طور پر 80 سے 100 بنڈل ایک برانچ کو دیے جاتے ہیں۔بینک کے کسٹمر ہزاروں میں ہوتے ہیں تو ایسے میں ان کی نئے کرنسی نوٹوں کی خواہش پوری کرنا بہت مشکل ہوجاتا ہے کہ کسے دیں اور کسے نہ دیں۔رانا عمیر نے بتایا کہ فی صارف 1 سے 2 پیکٹ دیئے جاسکتے ہیں، یعنی مجموعی طور پر 10، 20، 50 اور 100 روپے والے نوٹس ملا کر ایک بینک صارف کو زیادہ سے زیادہ 16 سے 18 ہزار روپے کے نئے کرنسی نوٹس دیئے جا سکتے ہیں۔
