ایچ بی ایل پاکستان سپر لیگ (پی ایس ایل) 10کے پانچویں میچ میں اسلام آباد یونائیٹڈ نے پشاور زلمی کو 102 رنز سے شکست دے دی۔
راولپنڈی میں کھیلے گئے میچ میں اسلام آباد یونائیٹڈکےکپتان شاداب خان نے پشاور زلمی کے خلاف ٹاس جیت کر بیٹنگ کا فیصلہ کیا۔اسلام آباد یونائیٹڈ نے پہلےکھیلتے ہوئے مقررہ 20 اوورز میں 5 وکٹوں کے نقصان پر 243 رنز بنائے۔
اسلام آباد یونائیٹڈ کے صاحبزادہ فرحان نے 106 رنز کی اننگ کھیلی، انہوں نے 49 گیندوں پر سنچری مکمل کی جس میں 13 چوکے اور 4 چھکے شامل تھے۔ان کے علاوہ کولن منرو 40 اور سلمان آغا 30 رنز بنا کر نمایاں رہے۔پشاور زلمی کی جانب سے جوزف اور حسین طلعت نے 2،2 کھلاڑیوں کو آؤٹ کیا۔
244 رنز کے ہدف کے تعاقب میں پشاور زلمی 141 رنز پر ڈھیر ہوگئی اور پوری ٹیم 19 ویں اوور میں آؤٹ ہوگئی۔پشاور زلمی کی جانب سے محمد حارث 87 رنز کے ساتھ نمایاں رہے۔ ان کے علاوہ کوئی بیٹر وکٹ پر نہ ٹھہر سکا۔کپتان بابر اعظم ایک رن بناسکے، صائم ایوب نے 6 رنز بنائے، حسین طلعت نے 13 رنز کی اننگز کھیلی۔
اسلام آبادیونائیٹڈ کی جانب سے عماد وسیم نے 3، شاداب خان اور بین ڈوارشئیس نے2، 2 وکٹیں حاصل کیں۔ایونٹ میں دونوں ٹیموں کا یہ دوسرا میچ تھا، اسلام آباد یونائیٹڈ کے اب 4 پوائنٹس ہوگئے ہیں جب کہ پشاور زلمی جیت کی منتظر ہے۔ پشاور زلمی کو پہلے میچ میں کوئٹہ گلیڈی ایٹرز سے شکست ہوئی تھی۔
