پاکستان کرکٹ ٹیم کے ہیڈ کوچ اور بنگلہ دیش کے خلاف اسکواڈ کےلیے نام فائنل کرلیے گئے۔
ذرائع کے مطابق پاکستان کرکٹ ٹیم کے ہیڈ کوچ کے لیے مشاورتی عمل جاری ہے، پی سی بی نے 4 مئی تک درخواستیں طلب کر رکھی ہیں۔ 4 مئی کے بعد قومی ٹیم کے ہیڈ کوچ کی تقرری ہوگی۔نیوزی لینڈ کے مائیک ہیسن پاکستان ٹیم کے ہیڈ کوچ کے لیے مضبوط امیدوار ہیں، ہیڈ کوچ کے لئے مشاورتی عمل میں مائیک ہیسن کی تجویز دی گئی ہے۔ ممکنہ طور پر مائیک ہیسن ہی پاکستان کرکٹ ٹیم کے ہیڈ کوچ ہوں گے۔ مائیک ہیسن اس وقت اسلام آباد یونائیٹڈ کے ہیڈ کوچ ہیں۔
ذرائع کے مطابق نئے ہیڈ کوچ کو وائٹ بال کرکٹ ٹیم کی ذمہ داری سونپی جائے گی، پاکستان ٹیم کی اگلی اسائنمنٹ بنگلہ دیش کے خلاف ٹی ٹونٹی سیریز ہے۔ بنگلہ دیش ٹیم 21 مئی کو پاکستان پہنچے گی۔پانچ ٹی ٹونٹی میچز کی سیریز کے دو میچ فیصل آباد اور تین میچز لاہور میں ہوں گے، صاحبزادہ فرحان، حسین طلعت ، حسن علی فہیم اشرف اور علی رضا بنگلہ دیش کے خلاف سیریز میں شامل ہوں گے۔
