جی سیون ممالک نے بھارت اور پاکستان پر زور دیا ہے کہ وہ بڑھتی کشیدگی کو کم کرنے کیلئے براہ راست مذاکرات کریں۔
عالمی طاقتوں نے بھارت اور پاکستان کے درمیان دہائیوں پرانے تنازع میں حالیہ شدت پر تشویش کا اظہار کیا ہے۔ یاد رہے کہ بدھ کو بھارت نے پاکستان پر فضائی حملے اور میزائل داغے، جس کے بعد دونوں ممالک کے درمیان روزانہ جھڑپیں جاری ہیں، ان جھڑپوں میں اب تک درجنوں افراد ہلاک ہوچکے ہیں۔
بھارت نے جمعہ اور ہفتہ کی درمیانی شب ایک بار پھر پاکستان پر حملہ کیا، اس بار ایئر بیسز کو نشانہ بنانے کی کوشش کی گئی۔ پاکستان نے بھارتی جارحیت کا بھرپور جواب دیتے ہوئے آپریشن ’’بنیان مرصوص‘‘ شروع کیا اور بھارت کے متعدد شہروں میں ایئر بیسز، فوجی تنصیبات اور اسلحہ ڈپوؤں کو تباہ کردیا۔
کینیڈا، فرانس، جرمنی، اٹلی، جاپان، امریکا، برطانیہ اور یورپی یونین کے وزرائے خارجہ نے ایک بیان میں 22 اپریل کو مقبوضہ کشمیر میں ہونے والے حملے کی شدید مذمت کی، جس میں 26 افراد ہلاک ہوئے۔جی7 ممالک کے بیان میں کہا گیا کہ ہم فوری طور پر کشیدگی کو کم کرنے کی اپیل کرتے ہیں اور دونوں ممالک کو پرامن حل کیلئے براہ راست مذاکرات کی حوصلہ افزائی کرتے ہیں۔امریکا سمیت دیگر ممالک نے بھی پاک بھارت کشیدگی میں اضافے کو تشویشناک قرار دیتے ہوئے دونوں ممالک کو معاملات بات چیت کے ذریعے حل کرنے پر زور دیا ہے۔
