بھارت پر فیصلہ کن حملہ کرنے سے تھوڑی دیر قبل جب اس آپریشن کی وزیر اعظم شہبا ز شریف کی زیر قیادت سول ملٹری قیادت نے منظوری دی تو اس پر آرمی چیف جنرل عاصم منیر نے ایک لمبی دعا کروائی۔
آپریشن کا نام اسلامی رکھا اور اس ہائی لیول میٹنگ کو یہ بھی بتایا کہ بھارت پر جوابی حملہ صبح نماز کے وقت کیا جائے گا کیوں کہ یہی اسلامی طریقہ ہے۔ میں نے ابھی تصدیق نہیں کی لیکن یہ بھی کہا جا رہا ہے نماز فجربھی آرمی چیف نے خود پڑھائی اور آپریشن کی کامیابی کیلئے دعا کی۔ پہلا میزائل جو بھارت پر داغا گیا، اُس پر نعرہ تکبیر بلند ہوا، یہی نہیں بلکہ ایک ایک میزائل داغے جانے پر نعرہ تکبیربلند کیا جاتا رہا، ہر ہر فوجی چاہے اُس کا تعلق بری، بحری یا فضائیہ سے ہو سب ایمان تقویٰ، جہاد فی سبیل اللّٰہ کے جذبہ سے سرشار تھے، شہادت کی خواہش رکھتے تھے اور پھر جو ہوا وہ دنیا نے دیکھا۔
کوئی حیران ہے تو کئی پریشان۔ کوئی سوچ بھی نہیں سکتا تھا کہ کھربوں خرچ کر کے جدیدترین اسلحہ سے لیس بھارتی فوج چند ہی گھنٹوں میں ایک ایسی فوج کے سامنے گھٹنے ٹیک دے گی جس کے بارے میں اُسے یقین تھا کہ وہ بھارتی فوج کے سامنے زیادہ دیر نہیں کھڑی ہو سکتی۔
بھارت کے پاس فرانس کے جدید ترین رافیل جنگی طیارے تھے، دنیا کا مہنگا ترین اور جدید روسی ائیر ڈیفنس سسٹم تھا، اسرائیل کے دنیا بھر میں مانے جانے والے ڈرونز تھے،سپر سونک میزائل براہموس تھے، اور پاکستان سے بہت بڑی فوج تھی۔ یہ سب کچھ ہوتے ہوئے پاکستان نے چند ہی گھنٹوں میں بھارت کو چت کر دیا اور ایسا چت کیا کہ وہ خوف کے مارے فوری بھاگا بھاگا امریکا کے پاس پہنچا کہ مجھے پاکستان سے بچاؤ۔ بھارت کے رافیل گرا دیے گئے، براہموس اور ڈرونز کو بھی تباہ کر دیا گیا۔جو بھارت پاکستان کو پاکستان کے اندر گھس کر مارنے کی دھمکی دے رہا تھا اُس پر سارا کھیل الٹ دیا گیا۔
بھارت کے کئی شہروں میں میزائل برسا دیے گئے، وہاں قائم درجنوں ائیر بیسز کے ساتھ ساتھ دفاعی تنصیبات اور اسلحے کے ڈپووں کو آگ اور شعلوں کے حوالے کر دیا گیا۔ بھارتی فوج اور فضائیہ کی ہمت نہ ہوئی کہ کچھ کر سکے۔صرف یہی نہیں بلکہ پاکستان نے سائبر وار میں اُس بھارت کے مہنگے ترین فضائی ڈیفنس سسٹم کو مکمل تباہ کر دیا، اُس بھارت کی اہم ترین انٹرنیٹ سائٹس کو ہیک کر لیا اور اُس بھارت کو ستر فیصد اندھیرے میں ڈبو دیا جو دنیا میں آئی ٹی کے شعبہ میں مانا جاتا ہے۔
یعنی فوج بڑی، پیسہ بہت زیادہ، اسلحہ جدید ترین اور مہنگا ترین، آئی ٹی میں چیمپئن یہ سب ہوتے ہوئے اپنے سے کئی گنا کمزور سمجھے جانے والے پاکستان سے ہار گیا۔ پاکستان کی فوج اور ہمارا دفاعی نظام بھی دنیا میں مانا جاتا ہے لیکن بھارت کے بارے میں یہ رائے عام تھی کہ وہ کنونشنل وار فیئر میں پاکستان سے بہت آگے ہے۔ لیکن پاکستان نے چند گھنٹوں میں بھارت کے غرور کو خاک ملادیا۔ کچھ لوگ اس کا کریڈٹ کسی جہاز، کسی میزائل اور فوج کی ٹریننگ کو دیتے ہیں لیکن اس حقیقت کو بھول جاتے ہیں کہ اللّٰہ تعالیٰ کی مدد اور نصرت کے بغیر اتنی بڑی کامیابی ممکن نہیں تھی۔ ہم نے یہ جنگ اسلامی اصولوں اور اسلامی تعلیمات کے مطابق لڑی۔
ہماری فوج جذبہ ایمانی سے لبریز تھی اس لیے میرا ایمان ہے کہ اللّٰہ تعالیٰ کی مدد یقینی تھی اور یہ بات بہت سے لوگ کر رہے ہیں۔ افواج پاکستان کے اندر بھی یہی سوچ پائی جاتی ہے۔یہ جنگ پاکستان اور بھارت کے درمیان نہیں تھی۔ یہ جنگ اسلام کی جنگ تھی جس میں اللّٰہ تعالیٰ نے اسلام کو ایک ایسی کامیابی دی جس پر دنیا بھر کے مسلمان خوش ہیں۔ اس کامیابی پر ہم خوش، بلکہ بہت خوش ہیں لیکن اس پر اب ہمیں کوئی غرور نہیں کرنا بلکہ اپنے اللّٰہ کا ذکر، حمد اورشکر بجا لانا ہے اور نماز پڑھنی ہے جیسا کہ ہمیں ہمارا دین بتاتا ہے۔
کافر ہے تو شمشیر پہ کرتا ہے بھروسا
مومن ہے تو بے تیغ بھی لڑتا ہے سپاہی
