اسلام آباد:وزیراعظم شہباز شریف نے کہا ہے کہ پاکستان معاشی استحکام کے بعد ترقی کی جانب گامزن ہے۔
وزیراعظم شہباز شریف سے عالمی مالیاتی ادارے کے وفد نے جہاد اظہور (Jihad Azour) کی قیادت میں ملاقات کی، جس میں پاکستان میں جاری آئی ایم ایف کے پروگرام پر گفتگو ہوئی۔دوران ملاقات حکومت کی آئی ایم ایف پروگرام پر عملدرآمد کے حوالے سے معاشی اصلاحات اور مثبت نتائج پر اطمینان کا اظہار کیا گیا۔وزیراعظم شہباز شریف کا کہنا تھا کہ اللہ کے فضل و کرم سے پاکستان معاشی استحکام کے بعد ترقی کی جانب گامزن ہے، حکومت کی اولین ترجیح ہے کہ میکرو اکنامک سطح پر اصلاحات کے ساتھ ساتھ ادارہ جاتی اصلاحات میں بھی تیزی لائی جائے۔
وفد نے پاکستان کے اصلاحات اور معاشی استحکام و ترقی میں آئی ایم ایف کی جانب سے تعاون جاری رکھنے کا اظہار کیا۔وفاقی وزراء احد خان چیمہ، محمد اورنگزیب، سیکرٹری خزانہ امداد اللہ بوسال، چیئرمین ایف بی آر راشد محمود لنگڑیال اور متعلقہ اعلیٰ حکام بھی اس موقع پر موجود تھے۔
