لاہور:پاکستان اور ہندوستان کے درمیان ہونیوالی سرحدی کشیدگی کے باوجود بھارتی ٹیم ایشیاکپ میں حصہ لے گی۔
میڈیا رپورٹس میں دعویٰ کیا جا رہا ہے کہ ٹی 20 ورلڈکپ کے انعقاد سے قبل پاک بھارت ہائی وولٹیج مقابلہ مداحوں کو دیکھنے کا ملے گا کیونکہ ایشیا کپ 2025 میں روایتی حریف ایک دوسرے کے مدمقابل آئیں گے۔ایونٹ کی میزبانی متحدہ عرب امارات (یو اے ای) کرے گا تاہم میزبانی کے رائٹس بھارت کے ہی سپرد ہوں گے، ایشیا کپ کا انعقاد رواں برس ستمبر میں ہونا ہے تاہم اس حوالے سے کوئی باضابطہ شیڈول جاری نہیں ہو سکا۔
میڈا رپورٹ میں کہا گیا ہے کہ پاکستان یا بھارت ایونٹ سے کوئی بھی دستبردار ہوتا ہے تو ایونٹ کے میڈیا رائٹس (جو 170 ملین ڈالر میں فروخت ہوئے ان پر اثر پڑے گا) اس لیے ایشین کرکٹ کونسل (اے سی سی) نے مبینہ طور پر صورتحال کو زیادہ پیچیدہ نہ بنانے اور ٹورنامنٹ کو غیر جانبدار مقام پر لے جانے کا فیصلہ کیا ہے۔اگر ٹورنامنٹ باضابطہ طور پر متحدہ عرب امارات منتقل ہوتا ہے تو یہ چوتھی بار ہوگا کہ ملک ایونٹ کی میزبانی کرے گا، پہلی بار یو اے ای میں ایشیاکپ کی میزبانی کا افتتاحی ایڈیشن 1984 میں ہوا تھا، بعدازاں پانچواں اور 14 واں ایڈیشن وہاں بالترتیب 1995 اور 2018 میں اسی مقام پر ہوا۔واضح رہے کہ رواں برس ہونیوالا ایشیاکپ ٹی 20 فارمیٹ پر کھیلا جائے گا جس کا مقصد ٹی 20 ورلڈکپ 2026 کی تیاری کرنا ہے۔
