اسلام آباد: وفاقی وزیر رانا تنویر حسین نے کہا ہے کہ چینی کی قیمتوں پر حکومت کی مکمل نگرانی ہے اور قیمتوں میں غیرمعمولی اضافے کی کسی بھی صورت اجازت نہیں دی جائے گی۔
چینی کی قیمتوں اور فراہمی کے حوالے سے ہونے والے اجلاس میں رانا تنویر حسین نے واضح کیا کہ چینی کی مناسب قیمت پر دستیابی حکومت کی اولین ترجیح ہے اور اس حوالے سے کسی بھی طرح کی من مانی برداشت نہیں کی جائے گی۔انہوں نے متعلقہ حکام کو ہدایت کی کہ چینی کی پیداوار، فراہمی اور قیمتوں کے معاملات میں شفافیت یقینی بنائی جائے تاکہ مارکیٹ میں استحکام پیدا کیا جا سکے۔ وفاقی وزیر نے کہا کہ یہ مقصد حکومت اور صنعت کے مشترکہ تعاون سے ہی حاصل کیا جا سکتا ہے۔
رانا تنویر حسین نے زور دے کر کہا کہ کسانوں اور صارفین دونوں کے حقوق اور مفادات کا تحفظ حکومت کی اولین ذمہ داری ہے۔اس موقع پر شوگر ڈیلرز ایسوسی ایشن نے بھی چینی کی بلا تعطل فراہمی کی ضمانت دی اور حکومتی پالیسیوں کی مکمل حمایت کا اعلان کیا۔وفاقی وزیر نے کہا کہ صارفین کو ریلیف دینے کے لیے تمام متعلقہ فریقین کو ساتھ لے کر چلنا ہوگا اور حکومت چینی کی قیمتوں پر مسلسل نظر رکھے ہوئے ہے۔
