لاہور: وزیراعلیٰ پنجاب مریم نواز شریف نے کہا ہے کہ پارلیمانی نظام جمہوریت کا دل اور ریاست کی اصل طاقت ہے۔ پارلیمانی نظام کے عالمی دن کے موقع پر اپنے خصوصی پیغام میں انہوں نے کہا کہ پارلیمان صرف قانون سازی کا ادارہ نہیں بلکہ قوم کی اجتماعی دانش، رہنمائی اور مستقبل کے فیصلوں کا مرکز ہے۔
وزیراعلیٰ نے پنجاب اسمبلی سمیت ملک بھر کے جمہوری ایوانوں کو خراجِ تحسین پیش کیا اور کہا کہ پنجاب اسمبلی نے ہمیشہ آئینی بالادستی اور قومی وحدت کی روشن مثالیں قائم کی ہیں۔ انہوں نے کہا کہ پنجاب اسمبلی کو جدید جمہوری تقاضوں سے ہم آہنگ کیا جا رہا ہے تاکہ یہ ادارہ مزید مؤثر انداز میں عوامی نمائندگی کر سکے۔مریم نواز نے قائداعظم محمد علی جناح کے جمہوری نظریات کا حوالہ دیتے ہوئے کہا کہ ان کی فکر کی روشنی میں پارلیمانی روایات کو مزید فروغ دیا جائے گا اور عوام کے اعتماد پر پورا اترنے کی ہر ممکن کوشش کی جائے گی۔
