اسلام آباد: ترکیہ کے وزیر خارجہ حکان فدان اپنے دورہ پاکستان کے سلسلے میں اسلام آباد پہنچ گئے ہیں۔ ترجمان دفتر خارجہ کے مطابق ایڈیشنل سیکرٹری سید علی اسد گیلانی نے ترک وزیر خارجہ کا استقبال کیا۔
دورے کے دوران ترک وزیر خارجہ وزیراعظم شہباز شریف، نائب وزیراعظم و وزیر خارجہ اسحاق ڈار اور فیلڈ مارشل عاصم منیر سے ملاقات کریں گے، جس میں دونوں ممالک کے درمیان دفاعی تعاون کو مزید مستحکم کرنے کے اقدامات پر تبادلہ خیال کیا جائے گا۔
یاد رہے کہ ترک وزیر دفاع یاشر گوولر بھی گزشتہ رات سرکاری دورے پر اسلام آباد پہنچے ہیں۔ دونوں وزیروں کا یہ دورہ پاکستان اور ترکیہ کے برادرانہ تعلقات کی عکاسی کرتا ہے۔
ترجمان دفتر خارجہ کے مطابق ایڈیشنل سیکرٹری سید علی گیلانی نے ترک وزیر دفاع کا بھی استقبال کیا، اور وزیر دفاع یاشر گوولر وفد کے ہمراہ وزیراعظم شہباز شریف اور نائب وزیراعظم اسحاق ڈار سے ملاقات کریں گے۔ اس کے علاوہ ترک وزیر دفاع دیگر اعلیٰ سول اور عسکری حکام سے بھی ملاقات کریں گے۔پاکستان اور ترکیہ کے درمیان تعلقات میں تاریخی ہم آہنگی پائی جاتی ہے، اور یہ دورہ دونوں ممالک کے درمیان مزید اقتصادی، سفارتی اور دفاعی تعلقات کو فروغ دینے کا باعث بنے گا۔
