’حمیرا اصغر لاوارث نہیں‘ ، سندھ حکومت کا سرکاری تدفین کرانے کا فیصلہ

کراچی:معروف ماڈل و اداکارہ حمیرا اصغر کی لاش کی بازیابی اور اہلِ خانہ کی جانب سے لاش وصول کرنے سے انکار کے بعد سندھ حکومت نے ان کی تدفین سرکاری سطح پر کرانے کا فیصلہ کر لیا ہے۔ وزیرِ ثقافت سندھ سید ذوالفقار علی شاہ نے کہا ہے کہ مرحومہ لاوارث نہیں، بلکہ سندھ حکومت ان کی وارث ہے اور ان کی تدفین عزت و احترام کے ساتھ کی جائے گی۔

ذرائع کے مطابق وزیر ثقافت نے اس افسوسناک واقعے پر گہرے دکھ کا اظہار کرتے ہوئے ایڈیشنل آئی جی کراچی سے فوری رابطہ کیا اور لاش کی حوالگی کے لیے تعاون مانگا ہے ۔ اس سلسلے میں سیکریٹری ثقافت سندھ کی طرف سے ڈی آئی جی ساؤتھ کو باضابطہ طور پر خط بھیجا گیا ہے تاکہ قانونی کارروائی مکمل ہونے کے بعد لاش محکمہ ثقافت کے حوالے کی جا سکے۔

وزیر ثقافت کا کہنا تھا کہ اگر حمیرا اصغر کے والدین یا دیگر قریبی رشتہ دار لاش وصول نہیں کرتے تو سندھ حکومت، خصوصاً محکمہ ثقافت، تمام تر تدفینی انتظامات اپنی نگرانی میں مکمل کرے گا۔ اس مقصد کے لیے ڈائریکٹر جنرل کلچر کو فوکل پرسن مقرر کر دیا گیا ہے تاکہ تمام مراحل مربوط انداز میں انجام دیے جا سکیں۔انہوں نے واضح کیا کہ تدفین کے لیے قبرستان کا انتخاب، آخری رسومات اور دیگر انتظامی امور حکومت سندھ کی سرپرستی میں مکمل ہوں گے۔ ان کا کہنا تھا کہ "ہم کسی بھی شہری کو آخری سفر میں تنہا نہیں چھوڑیں گے، چاہے وہ سماجی طور پر تنہا کیوں نہ ہو۔”