راولپنڈی: آئی ایس پی آر سمر انٹرن شپ 2025 کا آغاز ہو گیا، ملک بھر سے طلبہ کی بھرپور شرکت۔
آئی ایس پی آر سمر انٹرن شپ پاکستان کے 33 شہروں میں بیک وقت کامیابی سے جاری ہے، انٹرن شپ میں 150 سے زائد یونیورسٹیوں کے 6500 طلبہ پاکستان بھر سے حصہ لے رہے ہیں۔پاکستان کی سب سے بڑی اور جامع انٹرن شپ میں شرکت پر طلبہ کا جوش دیدنی ہے، طلبہ کو علمی، تخلیقی اور عملی سرگرمیوں سے بھرپور تربیت فراہم کی جا رہی ہے۔اس موقع پر طلبہ نے اپنے جذبات اور عزم کا بھرپور اظہار کیا اور کہا کہ پاکستان کو ترقی کی راہ پر گامزن کرنے میں نوجوان نسل کو اہم کردار ادا کرنا ہو گا۔
طلبہ کا کہنا تھا کہ ہم سب کو پاکستانی ہونے پر فخر ہونا چاہئے اور مل کر مُلک کی خدمت کرنی چاہئے۔انٹرن شپ پروگرام کے دوران ملک کی نامور شخصیات طلبہ کو اہم موضوعات پر رہنمائی فراہم کریں گی، تعلیمی ترقی اور قائدانہ صلاحیتوں کے فروغ کیلئے طلبہ کو اہم موضوعات سے روشناس کرایا جائے گا۔سمر انٹرن شپ پروگرام نوجوانوں کو نئی سوچ، نیا وژن اور عملی تربیت فراہم کرنے کا پلیٹ فارم ہے، سمر انٹرن شپ پاک فوج کی جانب سے نوجوان نسل کو باصلاحیت بنانے کے لیے موثر اقدام ہے۔
