لیہ:زگ زیگ ٹیکنالوجی کی خلاف ورزی پر بھٹہ مالک کے خلاف مقدمہ درج
لیہ (نیوز رپورٹر) تفصیلات کے مطابق ڈائریکٹر جنرل محکمہ تحفظ ماحول حکومت پنجاب عمران حامد شیخ کے احکامات پر ای پی اے لیہ کی ٹیم زیرِ نگرانی محمد ارشد چغتائی اسسٹنٹ ڈائریکٹر ماحولیات کی ضلع بھر میں آلودگی پھیلانے والوں کے خلاف کارروائیاں جاری ہیں۔ ڈپٹی کمشنر امیرا بیدار کی ہدایت پر اس سلسلہ میں محکمہ ماحولیات نے 10 بھٹہ جات کا معائنہ کیا۔ زگ زیگ ٹیکنالوجی کی خلاف ورزی پر بھٹہ مالک کے خلاف مقدمہ کا اندراج کیا گیا اور 1 بھٹہ کے غیر قانونی حصوں کو مسمار کیا گیا۔ صنعتی یونٹ میں آلودگی کنٹرول آلات کا معائنہ کیا گیا۔ واٹر ری سائیکلنگ پلانٹس کے بغیر چلنے والے 1 سروس اسٹیشن کو سیل اور 1 کے خلاف مقدمہ کا اندراج کیا گیا جبکہ 3 یونٹس میں پلانٹس کی تنصیب کو یقینی بنایا گیا۔ مختلف بھٹہ جات کے گرد 100 سے زائد درخت لگائے گئے۔ ڈینگی مچھر کی افزائش کے 20 سے زائد مقامات کا معائنہ کیا گیا۔ ایک ہسپتال کا معائنہ کر کے ہسپتال ویسٹ مینجمنٹ رولز کی خلاف ورزی پر نوٹس جاری کیا گیا۔ مختلف مارکیٹس کا معائنہ کرکے 110 کلوگرام غیر معیاری پلاسٹک شاپنگ بیگز کو بھی تحویل میں لیا گیا۔
