پشاور :بنوں میں پولیس سٹیشن پر ڈورن اور بھاری ہتھیاروں سے حملوں کو ناکام بنا دیا گیا ،ڈی پی او نے کہا کہ فتنہ الخوارج نے تھانہ میریان پر بھی ایک ناکام ڈرون حملہ کیا، لیکن پولیس کی بروقت کارروائی کی وجہ سے دہشت گرد واپس ہٹ گئے۔
سلیم عباس کلاچی نے عوام کو یقین دلایا کہ بنوں پولیس ہر قسم کی دہشت گردانہ سرگرمیوں کے خلاف بھرپور اور موثر اقدامات جاری رکھے گی تاکہ عوام کا جان و مال محفوظ رہے۔اس کے علاوہ بنوں کے علاقے نورڑ میں فتنہ الخوارج نے شاہراہ عام پر ناکہ بندی کی کوشش کی جسے پولیس نے فوری اور مؤثر کارروائی کے ذریعے ناکام بنا دیا۔ ڈسٹرکٹ پولیس آفیسر بنوں سلیم عباس کلاچی نے بتایا کہ دہشت گردوں کے مذموم عزائم ناکام بنا دیے گئے اور وہ موقع سے فرار ہو گئے۔ دہشت گردوں کے قبضے سے بھاری ہتھیار اور سنائپر رائفلز برآمد ہوئی ہیں۔
واضح رہے کہ گزشتہ روز بھی تھانہ میریان کی حدود میں دہشت گردوں کی بڑی تعداد کی اطلاع پر پولیس نے کارروائی کی تھی جہاں دہشت گرد مقامی آبادی سے زبردستی چندہ اکٹھا کر رہے تھے اور اس دوران فائرنگ کا تبادلہ بھی ہوا تھا۔
