فیصل آباد : فیصل آباد کی انسداد دہشتگردی کی خصوصی عدالت نے 9 مئی کے دو مقدمات کا فیصلہ سناتے ہوئے عمر ایوب، شبلی فراز اور دیگر سمیت مجموعی طور پر 108 ملزمان کو مختلف سزائیں سنا دیں۔
عدالت نے حساس ادارے پر حملے کے مقدمے میں 185 میں سے 108 ملزمان کو سزا سنائی جبکہ دیگر کو بری کر دیا گیا ہے۔ غلام محمد آباد میں درج مقدمے میں 66 ملزمان میں سے 58 کو 10 سال قید کی سزا دی گئی جبکہ 8 ملزمان کو بری کر دیا گیا۔اہم سزا یافتگان میں عمر ایوب، شبلی فراز، زرتاج گل اور رکن قومی اسمبلی صاحبزادہ حامد رضا شامل ہیں جنہیں 10 سال قید کی سزا سنائی گئی ہے۔ اس کے علاوہ جنید افضل ساہی کو سب سے کم سزا تین سال قید دی گئی ہے۔
تھانہ سول لائن کے مقدمہ نمبر832 کے فیصلہ میں 77 افراد کو بری کیا گیا۔انسداد دہشتگردی عدالت نے سیال کاسترو، فواد چوہدری اور شاہ محمود قریشی کے صاحبزادے زین قریشی کو بری کر دیا ہے۔فیصلے کے موقع پر عدالت کے اندر اور باہر سخت سیکیورٹی انتظامات کیے گئے تھے۔
