اسلام آباد:وفاقی تحقیقاتی ادارے (ایف آئی اے) نے ملک بھر کے تمام بین الاقوامی ایئرپورٹس پر غیر ملکی مسافروں کے لیے علیحدہ امیگریشن کاؤنٹرز قائم کر دیے ہیں۔
ترجمان ایف آئی اے کے مطابق یہ اقدام وزیراعظم شہباز شریف کی ہدایت پر کیا گیا، جس کا مقصد پاکستان میں سیاحت، غیر ملکی سرمایہ کاری اور کاروباری سرگرمیوں کو فروغ دینا ہے۔نئے امیگریشن کاؤنٹرز کراچی، لاہور، اسلام آباد، پشاور، ملتان اور سیالکوٹ کے ہوائی اڈوں پر قائم کیے گئے ہیں۔ ان کاؤنٹرز کے ذریعے غیر ملکی مسافروں کو تیز تر اور با سہولت امیگریشن کی سہولت فراہم کی جائے گی تاکہ انہیں غیر ضروری تاخیر کا سامنا نہ ہو۔
ترجمان نے مزید کہا کہ واپسی پر پاکستانی شہریوں کے لیے بھی امیگریشن کے عمل کو مزید مؤثر اور آسان بنایا جا رہا ہے۔ ایف آئی اے کے مطابق تمام بین الاقوامی ایئرپورٹس پر امیگریشن سروسز کو عالمی معیار کے مطابق بہتر بنانے کا عمل جاری ہے۔واضح رہے کہ 2 اگست کو وزیراعظم نے ہوائی اڈوں پر غیر ملکی مسافروں کی سہولت کے لیے علیحدہ امیگریشن کاؤنٹرز کے قیام کی منظوری دی تھی تاکہ پاکستان میں سیاحت اور سرمایہ کاری کو مزید تقویت دی جا سکے۔