اسلام آباد : وزیراعظم محمد شہباز شریف نے کہا ہے کہ پاکستان اقلیتوں کے حقوق کے تحفظ کے لیے دنیا کے ساتھ کھڑا ہے اور ان کی مذہبی آزادی کے لیے ہمیشہ کوشاں رہے گا۔
اقلیتوں کے عالمی دن کے موقع پر اپنے پیغام میں وزیراعظم نے کہا کہ حکومت کی ترجیحات میں اقلیتوں کی فلاح و بہبود شامل ہے اور ان کی خدمات کو قومی اثاثہ سمجھا جاتا ہے۔ انہوں نے اطمینان کا اظہار کیا کہ پاکستان میں اقلیتوں کو تمام شہری اور مذہبی حقوق حاصل ہیں۔
شہباز شریف کا کہنا تھا کہ بانی پاکستان قائداعظم محمد علی جناح کی 11 اگست 1947 کی تاریخی تقریر اقلیتوں کے محفوظ مستقبل کی ضمانت ہے۔ انہوں نے اس عزم کا اعادہ کیا کہ اقلیتوں کو مساوی مواقع فراہم کرکے قومی ترقی میں ان کا کردار مزید مؤثر بنایا جائے گا۔شہباز شریف نے یہ بھی کہا کہ پاکستان کو اقلیتوں کے جذبہ حب الوطنی اور ثقافتی ورثے سے لگاؤ پر فخر ہے، اور حکومت ان کی قومی دھارے میں بھرپور شمولیت کے لیے پرعزم ہے۔
