اسلام آباد :محکمہ موسمیات نے آئندہ چند روز میں ملک کے مختلف حصوں میں بارشوں کی شدت میں اضافے کی پیشگوئی کی ہے اور متعلقہ اداروں اور شہریوں کو الرٹ رہنے کی ہدایت کی ہے۔
پنجاب ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق، آج اسلام آباد، پنجاب کے مختلف اضلاع، بالائی خیبر پختونخوا، آزاد کشمیر اور گلگت بلتستان میں کہیں ہلکی اور کہیں موسلادھار بارش ہو سکتی ہے۔ انہوں نے مزید بتایا کہ مغربی ہوائیں اس وقت ملک کے شمالی اور بالائی علاقوں پر اثر انداز ہو رہی ہیں، جو ان علاقوں میں نمی اور ٹھنڈک کا باعث بن رہی ہیں۔
پی ڈی ایم اے کے مطابق 17 اگست سے مغربی ہواؤں کی شدت میں اضافے کا امکان ہے، جس سے بارشوں کا سلسلہ تیز ہو جائے گا۔ اس دوران اسلام آباد، راولپنڈی، لاہور، گوجرانوالہ، سرگودھا، ایبٹ آباد، مظفرآباد، گلگت اور دیگر علاقوں میں موسلادھار بارشیں متوقع ہیں۔ ساتھ ہی، تیز ہواؤں اور گرج چمک کے ساتھ بارش کا امکان بھی موجود ہے۔17 اگست کے بعد خلیج بنگال سے مرطوب ہواؤں کا نیا سلسلہ ملک میں داخل ہو گا، جو مغربی ہواؤں کے ساتھ مل کر ایک طاقتور موسمی نظام تشکیل دے گا۔ اس کے نتیجے میں 18 سے 21 اگست تک ملک کے بیشتر حصوں میں شدید بارشیں ہوں گی، جن میں کراچی، حیدرآباد، سکھر، کوئٹہ، پشاور، اسلام آباد، لاہور، فیصل آباد اور دیگر علاقے شامل ہیں۔
پی ڈی ایم اے نے شہریوں کو خبردار کیا ہے کہ اس دوران پہاڑی علاقوں میں لینڈ سلائیڈنگ کا خطرہ بڑھ جائے گا، جب کہ شہری اور نشیبی علاقوں میں اربن فلڈنگ اور ندی نالوں میں طغیانی کا خدشہ بھی ہے۔ترجمان پی ڈی ایم اے نے عوام سے اپیل کی ہے کہ وہ غیر ضروری سفر سے گریز کریں، کھلے مقامات پر موجود رہنے سے احتیاط کریں، ندی نالوں کے قریب رہائش پذیر افراد نقل مکانی پر غور کریں، موسمی اپ ڈیٹس پر نظر رکھیں اور حفاظتی اقدامات کو یقینی بنائیں تاکہ کسی بھی جانی و مالی نقصان سے بچا جا سکے۔
