اسلام آباد: وفاقی وزیر داخلہ محسن نقوی سے ایرانی ہم منصب سکندر مومنی نے ٹیلیفونک رابطہ کیا اور پاکستان میں سیلاب کی تباہ کاریوں کے باعث مدد کی پیشکش کی ہے۔ ایرانی وزیر داخلہ نے خصوصاً خیبرپختونخوا اور گلگت بلتستان میں طوفانی بارشوں اور سیلاب سے ہونے والے قیمتی انسانی جانوں کے ضیاع پر گہرا دکھ اور تعزیت کا اظہار کیا۔
سکندر مومنی نے جاں بحق افراد کے اہل خانہ سے دلی ہمدردی ظاہر کی اور سیلاب متاثرین کی مدد کے لیے تعاون کی پیشکش کرتے ہوئے کہا کہ پاکستان ہمارا برادر اور ہمسایہ ملک ہے اور آزمائش کی اس گھڑی میں ہر ممکن مدد کے لیے تیار ہیں۔ انہوں نے کہا کہ پاکستان میں سیلاب کی تباہ کاریاں دیکھ کر انہیں بہت افسوس ہوا اور وہ پاکستان کے عوام کے ساتھ مکمل یکجہتی کا اظہار کرتے ہیں۔
وفاقی وزیر داخلہ محسن نقوی نے ایرانی ہم منصب کی امدادی پیشکش اور اظہار یکجہتی پر شکریہ ادا کرتے ہوئے کہا کہ ایران اور پاکستان کے غم اور خوشیاں مشترک ہیں۔ انہوں نے کہا کہ موسمیاتی تبدیلیاں پاکستان میں ہولناک تباہی کا پیش خیمہ بن رہی ہیں اور تاریخ میں پہلی بار پاکستان اس خطرناک موسمیاتی صورتحال کا سامنا کر رہا ہے۔محسن نقوی نے مزید کہا کہ تمام ادارے سیلاب متاثرین کی مدد کے لیے فیلڈ میں متحرک ہیں اور متاثرین کی بحالی و ریلیف کو اولین ترجیح دی جا رہی ہے۔
