شارجہ میں کھیلے گئے سہ ملکی ٹی ٹوئنٹی سیریز کے چوتھے میچ میں افغانستان نے پاکستان کو 18 رنز سے شکست دے دی۔
افغانستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں پر 169 رنز بنائے۔ ابراہیم زادران نے 65 اور صدیق اللہ نے 64 رنز کی شاندار اننگز کھیلی۔ پاکستان کی جانب سے فہیم اشرف نے 4 وکٹیں حاصل کیں جبکہ صائم ایوب نے ایک کھلاڑی کو آؤٹ کیا۔
170 رنز کے ہدف کے تعاقب میں پاکستان کی ٹیم مقررہ اوورز میں 9 وکٹوں پر 151 رنز ہی بنا سکی۔ حارث رؤف 34 رنز کے ساتھ نمایاں بلے باز رہے، فخر زمان نے 25، سلمان آغا نے 20 اور صاحبزادہ فرحان نے 18 رنز جوڑے۔ افغان بولرز میں فضل الحق فاروقی، راشد خان، محمد نبی اور نور احمد نے دو، دو وکٹیں حاصل کیں۔
سیریز کے پہلے میچ میں پاکستان نے افغانستان کو 39 رنز سے شکست دی تھی تاہم اس میچ میں افغانستان نے زبردست کم بیک کرتے ہوئے پاکستان پر برتری حاصل کر لی۔
