دوحہ: وزیراعظم شہباز شریف نے ایرانی صدر مسعود پزشکیان سے ملاقات کی جس میں نائب وزیراعظم اسحاق ڈار، فیلڈ مارشل عاصم منیر اور وزیر دفاع خواجہ آصف بھی شریک تھے۔ ملاقات کے دوران دونوں رہنماؤں نے امت مسلمہ کے اتحاد پر زور دیا اور خطے کی تازہ صورتحال پر تبادلہ خیال کیا۔
وزیراعظم شہباز شریف نے اسرائیلی جارحیت کی شدید مذمت کرتے ہوئے قطر کے ساتھ مکمل یکجہتی کا اعادہ کیا۔ انہوں نے کہا کہ دوحہ سمٹ نے اسرائیل کو ایک واضح اور متحد پیغام دیا ہے۔ وزیراعظم نے ایران کے ساتھ تعلقات مزید مضبوط بنانے کی خواہش کا اظہار کرتے ہوئے ایرانی سپریم لیڈر آیت اللہ خامنہ ای کے لیے نیک خواہشات بھی بھیجیں۔
ایرانی صدر مسعود پزشکیان نے فلسطین کے معاملے پر پاکستان کے مؤقف کو سراہتے ہوئے کہا کہ اسلام آباد نے ہمیشہ اصولی اور جرات مندانہ پوزیشن اختیار کی ہے۔ دونوں رہنماؤں نے پاکستان اور ایران کے درمیان قریبی رابطہ اور باہمی تعاون جاری رکھنے پر اتفاق کیا۔
