واشنگٹن: امریکی صدر ڈونلڈ ٹرمپ نے معروف امریکی اخبار نیو یارک ٹائمز پر ہتک عزت اور توہین کا مقدمہ دائر کرنے کا اعلان کردیا ہے۔
صدر ٹرمپ نے اپنے سوشل میڈیا پلیٹ فارم ٹرتھ سوشل پر لکھا کہ انہیں یہ "اعزاز” حاصل ہوا ہے کہ وہ نیو یارک ٹائمز کے خلاف 15 بلین ڈالر کا مقدمہ دائر کر رہے ہیں، جو فلوریڈا کی عدالت میں درج کیا جائے گا۔
صدر ٹرمپ نے الزام عائد کیا کہ نیو یارک ٹائمز ان کے، ان کے خاندان اور کاروباری معاملات کے حوالے سے طویل عرصے سے جھوٹ پر مبنی خبریں شائع کرتا رہا ہے۔ ان کا کہنا تھا کہ اس ادارے کو بہت زیادہ عرصے تک آزادانہ طور پر ان کے خلاف غلط بیانی اور بدنامی کی اجازت دی گئی، مگر اب یہ عمل مزید برداشت نہیں کیا جائے گا۔
واضح رہے کہ ٹرمپ اس سے قبل بھی کئی بار امریکی میڈیا اور اخبارات پر جانبداری اور جھوٹی خبریں پھیلانے کے الزامات لگا چکے ہیں، تاہم اس بار انہوں نے براہِ راست بھاری معاوضے کے ساتھ قانونی چارہ جوئی کا اعلان کیا ہے۔
