اسلام آباد میں انسٹیٹیوٹ آف ریجنل اسٹڈیز کی تقریب سے خطاب کرتے ہوئے عطا تارڑ نے کہا کہ عسکری میدان میں ناکامی کے بعد بھارت اب کھیل کے شعبے میں بھی اوچھے ہتھکنڈے استعمال کر رہا ہے۔ پاکستان نے نہ صرف بھارت کے گمراہ کن پروپیگنڈے کو بے نقاب کیا بلکہ اس کی بلاجواز جارحیت کا منہ توڑ جواب دیا۔
انہوں نے کہا کہ چار روزہ جنگ میں پاکستان نے فتوحات کی نئی داستان رقم کی، بھارت نے پاکستان کے بھرپور جواب کے بعد جنگ بندی کی درخواست کی۔ مودی حکومت اور ہندوتوا نظریے کو عبرتناک شکست ہوئی، بھارت ایک غاصب اور جارح ملک ہے جو دنیا کے سامنے مظلوم بننے کی کوشش کر رہا ہے۔
عطا تارڑ نے اپنے خطاب میں پہلگام واقعے کا حوالہ دیتے ہوئے کہا کہ اس واقعے کی حقیقت دنیا کے سامنے آچکی ہے، پاکستان نے اس معاملے پر آزادانہ تحقیقات کی پیشکش بھی کی تھی۔ دہشت گردی کے خلاف پاکستان کی جنگ صرف اپنے لیے نہیں بلکہ دنیا کو محفوظ بنانے کے لیے ہے۔
وفاقی وزیر کا مزید کہنا تھا کہ بین الاقوامی اصولوں سے روگردانی کرنے والا بھارت مظلومیت کا ڈھونگ نہیں رچا سکتا۔ پاکستان پُرامن بقائے باہمی پر یقین رکھتا ہے اور خطے میں امن و استحکام کے لیے ہمیشہ کلیدی کردار ادا کیا ہے۔
انہوں نے اس عزم کا اعادہ کیا کہ پاکستان مقبوضہ کشمیر کے عوام کی سیاسی، اخلاقی اور سفارتی حمایت جاری رکھے گا اور مسئلہ کشمیر کا حل اقوام متحدہ کی قراردادوں کے مطابق چاہتا ہے۔
