جرمنی، یورپی یونین اور کینیڈا کی مذمت، اسرائیل پر پابندیاں متوقع
غیر ملکی میڈیا کے مطابق کئی ہفتوں سے جاری فضائی بمباری کے بعد اسرائیلی فوج نے اب غزہ شہر میں زمینی کارروائیاں شروع کر دی ہیں، جن کے نتیجے میں مزید 90 بے گناہ فلسطینی شہید ہو گئے۔
بین الاقوامی سطح پر اسرائیلی کارروائیوں کی مذمت کا سلسلہ تیز ہو گیا ہے۔ جرمنی اور یورپی یونین نے غزہ پر زمینی حملے کو انسانی بحران کو مزید سنگین بنانے والا قدم قرار دیا ہے۔ یورپی یونین کی خارجہ پالیسی سربراہ کایا کالاس نے کہا کہ زمینی کارروائی غزہ کی بدترین صورتحال کو مزید بگاڑ دے گی، جبکہ یورپی کمیشن کے اجلاس میں اسرائیل پر پابندیاں عائد کیے جانے کا امکان ہے۔
اسی طرح کینیڈا نے بھی اسرائیلی اقدامات پر شدید ردعمل دیتے ہوئے کہا ہے کہ غزہ سٹی پر زمینی حملہ "انتہائی خوفناک” ہے، جو انسانی بحران کو مزید شدید بنا رہا ہے۔ کینیڈین حکام نے زور دیا کہ اسرائیل کو ہر حال میں بین الاقوامی قوانین کی پاسداری کرنی چاہیے۔
