بلوچستان سمیت ملک بھر میں افغان مہاجرین کے انخلاء کا تیسرا مرحلہ جاری، 30 ہزار سے زائد افراد وطن واپس بھیجے گئے
ملک بھر کی طرح کوئٹہ سمیت بلوچستان سے بھی افغان مہاجرین کے انخلاء کا تیسرا مرحلہ جاری ہے۔ حکومت پاکستان کے فیصلے کے مطابق غیر قانونی طور پر مقیم افغان مہاجرین اور دیگر غیر ملکیوں کی واپسی کا یہ مرحلہ یکم ستمبر سے شروع ہوا۔ اس دوران اب تک 30 ہزار سے زائد افغان باشندے اپنے وطن واپس جاچکے ہیں جن میں سے 20 ہزار افراد نے رضاکارانہ طور پر وطن واپسی کا انتخاب کیا۔
کوئٹہ میں اس وقت 33 سے زائد تعلیمی ادارے اور صحت کے مراکز افغان باشندوں کے زیرانتظام چل رہے ہیں، جنہیں انتظامیہ نے نوٹسز جاری کردیئے ہیں۔ ضلعی انتظامیہ اور پولیس فورس غیر قانونی غیر ملکیوں کی نشاندہی اور ان کے انخلاء کے عمل میں متحرک ہیں۔ انتظامیہ کا کہنا ہے کہ افغان باشندوں کے آباد علاقوں کی نشاندہی کرلی گئی ہے اور جلد تمام غیر قانونی افراد کو واپس بھیجنے کا عمل مکمل کر لیا جائے گا۔
