ریاض کی عمارتیں پاکستان اور سعودی پرچم کے رنگوں سے منور، اسٹریٹجک دفاعی معاہدہ طے پا گیا
سعودی عرب کے دارالحکومت ریاض کی بلند و بالا عمارتوں کو پاکستان اور سعودی عرب کے پرچم کے رنگوں سے سجایا گیا۔ عمارتوں پر پاکستان کا سبز و سفید ہلالی پرچم جگمگا رہا ہے جبکہ ساتھ ہی سعودی عرب کا سبز پرچم بھی روشنیوں سے نمایاں کیا گیا ہے۔ اس خوبصورت منظر کو دونوں ممالک کے شہریوں نے بھرپور سراہا۔
یاد رہے کہ حال ہی میں سعودی ولی عہد محمد بن سلمان اور وزیرِ اعظم پاکستان شہباز شریف نے دارالحکومت ریاض میں ایک تاریخی "اسٹریٹجک باہمی دفاعی معاہدے” (SMDA) پر دستخط کیے ہیں۔ اس معاہدے کا مقصد دونوں ممالک کے درمیان دفاعی تعاون کو فروغ دینا اور کسی بھی جارحیت کے خلاف مشترکہ دفاع و تحفظ کو یقینی بنانا ہے۔
معاہدے میں یہ شق بھی شامل ہے کہ اگر کسی ایک ملک پر جارحیت ہوتی ہے تو اسے دونوں ممالک کے خلاف جارحیت تصور کیا جائے گا۔ یہ پیش رفت نہ صرف پاکستان اور سعودی عرب کی سلامتی کو مزید مستحکم کرے گی بلکہ خطے اور دنیا میں امن و سلامتی کے قیام کے لیے دونوں ممالک کے عزم کی عکاسی بھی کرتی ہے۔
